Sempre digo que para min
o basket é coma unha relixión laica. Sen ánimo de ofender a quen poida
considerar excesiva esta afirmación miña. Pero que lle vou facer, así o sinto.
Aprendín a amar o basket acompañando de cativo a miña nai mentras ela calcetaba
mirando na TV en branco e negro ao mítico Real Madrid dos Brabender, Luyk,
Emiliano... no inesquecibel Torneo de Navidad. Cos anos reparei en que na cancha do Joventut de
Badalona había debuxado no seu parqué só liñas de baloncesto... e dende aquela
sonche da Penya. Nos bos e nos
malos tempos. Tempos de gloria e tempos case de caída no inferno. Pero o equipo
verdinegro sempre saiu adiante e voltará sen dúbida, antes que tarde, a
competir en todo, para todo e con todos ao máximo nível. E si, nin o Barça nin
o Madrid... o primeiro en gañar unha Liga Europea foi o Joventut de Badalona
unha noite do mes de abril de hai agora vinte anos.
No hay comentarios:
Publicar un comentario